Ni-ubos ug 500K o tunga sa milyon ang gidaghanon sa mga botante sa tibuok Sugbo nga mosalmot sa Sangguniang Kabataan ug Barangay Elections (SBKE) sa Oktubre 30, 2023.
Matud ni Omar Sharif Mamalinta, spokesperson sa Comelec Cebu Province, nga adunay 3,968,463 ka mga botante sa 2018 barangay elections apan karun nius-os kini sa 3,404,922.
Base sa ilang datos, nakuhaan kini ug 563,541.
Gipasbaot ni Mamalinta nga ni-ubos ang ihap sa mga botante human sila nanglimpyo sa ilang record diin gi-delete na sa ilang record ang kadtong nangamatay sa miaging upat ka mga tuig, mga botante nga nagdoble ang rehistrasyon ug kadtong mga botante nga wala makabotar sa miaging duha ka sunodsunod nga mga piniliay.
Nasayran nga sa 3.4 milyunes ka mga botante, 746,154 ang gikan sa Cebu City samtang 2,401,093 gikan sa lalawigan sa Sugbo, lakip na ang lone districts sa Lapu-Lapu City, Mandaue City ug component cities.
Samtang ang filing sa certificate of candicacy (COC) magsugod karong Hulyo 3 hangtod sa Hulyo 7, 2023.//
