PADAYUN pa ang gihimong imbestigasyon sa kapulisan sa San Isidro police station sa nahitabong pagpusil patay sa manager sa security agency sa Brigada nga si Demar Santos, 37-anyos ug residente sa Brgy.San Isidro, GenSan.
Sa imbestigasyon sa kapulisan, riding in tandem ang responsable sa pagpamanhig sa biktima samtang sakay sa gimanehuang sakyanan sa Purok Intake, sa Brgy. Mabuhay.
Segun sa nakakita, may motor nga naghulat sa lugar ug pag-abot ni Santos, didto gipaarakan ug wala nakuntento ang mipusil minaog pa ug giduolan ang driver seat ug gipaarakan, ug giitsa sa gunman ang armas ngadto sa naghulat nga pick up nga kolor gray.
Narekober sa crime scene ang siyam ka basiyo sa .45 caliber pistol.
Gipasalig usab ni Police Capt Adusalam Mamalinta nga himuon ang lawom nga imbestigasyon aron mailhan ang mga responsable.
Hugot usab gikondena sa pamilya sa biktima ug sa Brigada ang nahitabo sa biktima nga laing masubo na usab nga insidente asa duha ang gihunosan sa ilang kinabuhi, sa mga walay konsensya nga mga tawo, una si Brigada Executive Office Director ug Chief of Staff Yentez Quintoy nga gipusil usab samtang nagamaneho sa iyang sakyanan nga hinungdan sa iyang hinanaling kamatayon.
Gitugyan usab ni Idol Brigada Elmer Catulpos sa kapulisan ang pagsulbad sa duha ka insidente sa pagpamusil sa iyang mga empleyado.
