GIIMBESTIGAHAN na sa LGU-GenSan ang gipaabot nga sumbong sa 888 Citizen’s Complaint Center ilawom sa Office of the President.
Gisumbong sa wala nagpailang reklamante ang wala usab niini gipangalang department ug division head sa LGU.
Sa pagpangolekta og salapi gikan sa mga empleyado alang sa Christmas party. Lakip ang pagpaningil og P6, 000 – 7,000 sa casual employee nga buot makaangkon sa plantilla position. Samtang P3,000 -4,000 ang singil sa wala gipanganlan sa reklamo nga department ug division head sa Job Orders alang sa plantilla position.
Matud ni Atty. Franklin Gacal Jr., city administrator giimbestigahan na nila ang reklamo.
Apan giangkon nga lisod ang pag-imbestiga gumikan wala gipanganlan sa reklamo ang mga gireklamong tao.
Luyo sa buot ni Bise Mayor Rosalita Nuñez nga imbestigahan ang hitabo dili siya motuo nga dunay opisyal sa LGU nga mohimo niini.
Sa dokumentong nakuha sa Brigada News team, Agosto 19, 2024 gipaabot ang sumbong sa Office of the President. Sa karon, gihatagan og 72 oras ang LGU aron tubagon ang maong reklamo. I Richel Gubalani
