KORONADAL CITY- NANUMPA na bilang mga bagong miyembro ng Philippine National Police o PNP ang 80 mga bagong police recruits para sa Calendar Year 2022 1st Cycle Attrition Recruitment Program.
Ang mga bagong police officers ay sasailalim sa mandatory training at Public Safety Basic Recruit Course (PSBRC) sa loob ng anim na buwan para sa intensive at progressive training upang mabigyan ang mga ito ng basic knowledge at skills sa community policing, administration, combat operation and tactics.
Ito ay susundan ng anim na buwan na immersion o Field Training Program na kinabibilangan ng actual experience sa patrol, traffic control, at investigation works na requirement para sa kanilang permanent appointment.
Ang mga recruits ay una nang pumasa sa recruitment process katulad ng Body Mass Index (BMI), Physical Agility Test, Physical, Medical, and Dental Examination, Neuro-Psychiatric Examination, at Complete Background Investigation.
Umapela naman si PNP 12 Regional Director Police Brigadier Jimili Macaraeg sa mga bagong pulis na huwag sayangin ang kanilang pinaghirapan.
Napag-alaman na sa 296 na mga aplikante, 80 lamang ang pumasa at nanumpa.
