WALAY natala nga insidente sulod sa Bulaong terminal sa GenSan atol sa Kapaskuhan ug gipaningkamotan sa mga personahe sa terminal nga hapsay ang dagan sa biyahe karong umaabot nga bag-ong tuig.
Kini human nga doble ang gihimong pagbantay sa mga trabahante sa terminal lakip na sa walo ka Pulis nga gidugang aron magbantay sa sulod ug gawas sa terminal.
Matud pa ni Raymond Ledesma Chief Administrator sa Bulaong terminal mitaas ang ihap sa mga pasahero nga midagsa sa Bulaong karong bulan sa Disyembre kasagaran gikan sa South Cotabato ug Davao City nga mipauli sa ilang mga lugar.
Nagpahimangno si Ledesma sa publiko nga magsayo og biyahe aron dili maabtan og ‘peak hour’ sa dalan. Siguruhon nga luwas ang dala nga mga bagahi, ug likayan nga kini ang mahibilin sa sakyanan aron dili makamugna og kabalaka sa ubang pasahero.
Gisiguro sa opisyal nga hapsay ang sitwasyon sa Bulaong terminal inubanan sa tabang sa mga CSU member, kapulisan, ug mga force multiplier. I Enamie Mogpon
