SORSOGON CITY – Kinumpirma ng pamunuan ng Sorsogon Prov’l Health Office (PHO) na umabot sa 8 katao ang sumakabilang buhay matapos masapol ng Covid-19 kahit bakunado na.
Ayon kay Prov’l Health Officer Dr. Renato Bolo Jr., base sa kanilang talaan, sa kabuuang 286 na nasawi sa nasabing sakit, 7 dito ang fully vaccinated na habang ang isa ay nakatanggap pa lamang ng kanyang first dose.
Kinumpirma rin ng opisyal na batay sa kanilang pag-aaral, maraming senior citizen na fully vaccinated na ang nakaligtas mula sa pagkasawi kumpara sa mga hindi pa nabakunahan.
Aniya pa, mas mataas ang tsansa na masawi ang isang Covid positive kung di pa ito bakunado o first dose pa lamang ang natatanggap kumpara sa mga fully vaccinated na.
Bunsod nito, patuloy ang panawagan ng PHO lalo na sa mga senior citizens na magpabakuna na kontra Covid-19.
