LEGAZPI CITY – Pig-decamp na an nasa 55 mga natatadang pamilyang Mayon evacuees kan Camalig, Albay.
Ini makalihis na ibaba kan PHIVOLCS sa alert level 2 an status kan bulkan hale sa alert level 3 durante sa mga naobserbarang pagbaba kan mga parametros.
Katabang an Municipal Disaster Risk Reduction and Management Office, Municipal Social Welfare and Development Office asin iba pang mga partner agencies sa pagpapadecamp asin paghatod kan mga evacuees.
Antes man an decampment, an Department of Social Welfare and Development, nagtao nin mga ayuda sa paagi kan family food packs para sa mga pamilya nganing masyerto na igwa sindang makakakan sa pagbalik ninda sa saindang mga harong.
Padagos man an pagiromdom kan lokal na gobyerno na dai magpasiring sa six kilometers permanent danger zone kan bulkan huli ta peligroso paman giraray ini dawa pa ibinaba na an alert level kaini.
