MOKABAT sa 50 personahe sa presinto sa GenSan ang mipailawom sa drug testing, Martes sa buntag sa Barangay Tambler.
Matud ni Police Major Ian Bagot, hepe sa Tambler Police Station, gipahigayon ang random drug testing sa mga non-commissioned ug non-uniformed personnel sa presinto.
Ang inisyatibo ang dungan sa lakang sa organisasyon kalabut sa pagpanglimpyo sa ilang tungkaran ug silhigon ang mga personahe nga lambigit sa gidiling droga, dugang ni Bagot. Ang suprisang drug testing nga gihimo ang base sa Article 3 sec. 36 paragraph (e) sa Republic Act (RA) 9165 o Comprehensive Dangerous Drugs Act of 2002.
Kini ang nagmandu sa mga officers ug empleyado sa mga buhatan sa gobyerno nga mopailawom sa random testing aron masigurong magpabilin nga drug-free ang mga ahensiya sa gobyerno. Gihimo ang proseso sa Regional Crime Laboratory o Regional Forensic Unit (RFU) XII.
Dugang ni Bagot ang masuta nga positibo sa paggamit og gidiling droga ang mapailawom sa summary dismissal proceedings sa Regional Internal Affairs Service. I Richel Gubalani
