Arestado ang lima ka Chinese Nationals ug 13 ka Pilipino tungod sa gi-ingong pagkalambigit sa illegal mining operations sa Misamis Oriental.
Matud ni Department of Environment and Natural Resources, Northern Mindanao Region 10 Legal Division Chief Ban Mikhael Pacuribot nga nakig-koordinar na sila sa Bureau of Immigration aron maila ang mga foreigner kinsa nasapun sa akto nga mihimo sa illegal mining operations niadtong Mayo 13, adlaw’ng Sabado.
Una na matud pa silang nakadawat og report gikan sa ilang mga kaubanan ug didto nila nakumpirma dihang ilang gibisitahan ang maong lugar.
Nag-operate usab ang mga nahisgutang akusado sa Barangay Tumpagon ug Pigsag-an, kung asa moabot sa 7.3 ka ektaryang luna ang ilang gakalotan 24 oras kada adlaw.
Mag-atubang sa kasong pagsupak sa Republic Act 7942 o Philippine Mining Act; RA 7076 o Small Scale Mining Act; RA 9275 o Philippine Water Act; ug RA 9149 o Wildlife Resources Conservation and Protection Act ang mga responsabli.
Lakip sa ilang nasupak mao ang Presidential Decree 1067 o Water Code of the Philippines; PD 705 o Forestry Code of the Philippines; ug Article 151 sa Revised Penal Code.
Una nang gibutyag ni Mines and Geosciences Bureau-10 Director Felizardo Gacad Jr. nga dugay nang gisugdan ang maong mining operation basi sa mga gamit nga ilang nakumpiska sa area. -END-
