Gideklara niadtong adlawng byernes nga nakabsan ug kinabuhi ang usa ka 43-anyos nga turista kinsa nadisgrasya niadtong Hulyo 11, 2024 sa gisuwayan nga water sports nga jumping balloon sa usa ka floating cottage rental sa San Vicente, Olango Island, Lapu-Lapu City.
Ang maong biktima residente sa Cagayan De Oro City.
Base sa inisyal nga imbestigasyon ni PCMS Erwin Suson ug sa mga nakaduty nga mobile responders, ang staff sa maong cottage nilayat padung sa jumping balloon nga naa sa dagat aron nga ang biktima, kinsa anaa sa pikas tumoy sa jumping balloon mo bounce ug didto dapat kini motugpa sa dagat.
Apan imbes nga sa dagat motugpa, didto nitugpa balik sa jumping balloon ang biktima ug nag-una ang ulo niini, ug natagak dayon kini sa dagat nga unconscious na.
Dali kining gisawm sa laing usa ka staff ug nadala pa kini sa Sta. Rosa Community Hospital apan gi-refer sa Chong Hua Hospital ug gibalhin na usab sa Vicente Sotto Memorial Medical Center.
Apan alas 6:30 niadtong byernes, Hulyo 19, gideklara sa attending physician niini nga nakabsan na ug kinabuhi ang biktima.
Pasakaan ug kasong reckless imprudence resulting in homicide ang tag-iya, caretaker ug duha ka staff sa maong cottage rental.
Subay niini temporaryo nang gipahunong ang operasyon sa floating cottage. | Kristyl Joy Felerca
