SUGDAN na sa Miyerkoles ang pagbakuna sa 3,999 ka empleyado sa 200 ka pribadong kompanya sa GenSan. Dungan sa pag-abot sa dakbayan sakay sa Philippine Airlines (PAL) sa halos 8,000 ka vials sa Sinovac vaccine.
Matud ni Cyril Ang, Presidente sa Filipino Chinese Chamber of Commerce (SCFCCCI) gipalit nila kini sa China. Naa sa 1,600 ka empleyado sa SCFCCI ang bakunahan og duha ka dose nga himoon sa vaccination team sa St. Elizabeth hospital gamit ang Digital Vaccination Platform na Safify.
“We just bought it and we gonna give it to our employee and to the people for free,” asoy ni Ang. Samtang naa sa 4,000 ka vials sa maong brand sa bakuna ang ihatag sa mga empleyado sa KCC mall sa GenSan ug Koronadal City.
Gipasalamatan usab ni Mayor Ronnel Rivera ang pangulohan sa SCFCCI sa gihimong lakang niini aron mabakunahan ilang mga empleyado. Giangkon ni Rivera dili makayang maabot sa siyudad nga bakunahan dayon ang 70% sa 647,000 plus populasyon hinungdan nga dakong tabang ang gihimo sa grupo sa mga negosyante.
Giapud-apud ang bakuna nga gipalit sa SCFCCI sa mga rehiyon human na kumpleto ang dokumento sama sa certificate of analysis (COA) gikan sa Sinovac nga usa sa rekisitos sa Food and Drug Administration (FDA). ( Richel Gubalani)
