APRUBADO na sa Election Registration Board kun ERB hearing ang kapin sa 30 mil ka mga voter registrants sa Comelec Gensan ug madugang kini sa 329,801 ka mga botante sa umaabot nga piniliay.
Sa paghinabi sa 89.5 Brigada News FM Gensan kay City Comelec Office Atty. Sittie Sharmanine Papandayan Garangan sumala niini nga kompleto ang miyembro sa Election Registration Board kon ERB nga nagtambong.
Ang duha mao silang DepEd Schools Division Superintendent Romelito Flores ug ang labaw sa Local Civil Registrar nga si Nenita Ellivera.
Gipahigayon ang pagdungog Oktubre 19 sa kasamtangan nga tuig sa opisina sa Comelec Gensan sa Barangay Hall sa West ug ang sunod nga hearing ipahigayon usab sa bulan sa Nobyembre kon mahuman ang lugway sa registration.
Sa dugang impormasyon wala usab may nagprotesta sa 30,192 ka mga aplikasyon sa pagka botante gikan sa bulan sa Hulyo hangtud Septembre kasagaran niini nga ‘new’ nga mokabat sa 17,968 ka registrants.
Gidugang ni Garangan nga sa karon aduna nay 329,801 voters ang Gensan unya madugang ang 30,192 samtang madugang usab ang kasamtangan pa nga nagaparehistro hangtud sa Oktubre 30,2021. ( Ver Diazon)
