LEGAZPI CITY – Maabot sa 30 kaso nin Violence Against Women and Children (VAWC) an nairehistro sa banwaan kan Camalig, Albay. Kinumpirmar ini kan Municipal Social Welfare & Development Office, kun sain basado sa datos, kumpuwesto ini ki 18 insidente nin physical abuse, duwang psychological abuse, sarong alleged trauma, apat na may kinaaraman sa custody disputes, duwang kaso nin acts of lasciviousness, asin tulong kaso nin financial support.
Pigresibe mismo kan opisina an mga reklamo asin tinawan ki mga programang makakatabang sa mga ini kaiba an pakikipagtabangan sa manlain-laing ahensya asin mga stakeholders nganing masiyerto an suporta asin proteksyon kan mga biktima.
Sa ngunyan, padagos an pagigin aktibo kan lokal na gobyerno sa pagpugol kan mga mararaot na kaso kun sain nabibiktima an mga nasa bulnerableng sektor orog na sa pagpapautob kan Anti-Violence Against women and their Children Act of 2004.
