LEGAZPI CITY – Kinumpirmar kan Commission on Elections (COMELEC) Albay na 3 suportadores nin kandidato sa banwaan kan Oas an pinadarhan man ki show cause order hale sa COMELEC nasyonal.
Sa intrevista kan Brigada News FM Legazpi kay COMELEC Albay Provincial Election Supervisor Atty. Ma. Aurea Bo-Bunao, sinabi niya, ngunyan bako man mismong kandidato an pinadarhan kundi an mga suportadores.
Segun saiya, nag-post kaya an mga ini sa social media ki pandok kan kandidato asin may nakabugtak na “VOTE”, kaya klaro saindang suportadores an mga ini.
Klaro su boot na pagbalgar ini sa omnibus election code kan komisyon kaya tulos ining nireklamo asin pinadarhan ki show cause order.
Ngunyan, may karapatan an mga suportadores na nasampolan na mag-eksplikar sa komisyon kun nata dai sinda dapat sangatan nin kaso.
Segun kay Bunao, saro ining wake-up call bako sana sa mga kandidato kundi pati man sa mga suportadores na dawa ordinaryong tawo sana, dapat mag-alat kan tamang oras kan karampanyahan nganing dai magkaproblema.