LEGAZPI CITY – Tulong persona an naarestar kan mga otoridad sa magkakasuway na operasyon asin lugar sa banwaan kan Polangui, Albay.
Sa Brgy. Napo, arestado an akusadong si alyas “Alex”, 58 anyos huli sa kasong pang-aabuso ki aki.
Naarestar ini sa kusog kan mandahamiento de aresto para sa naunambitang kaso asin may piyansang maabot sa PHP80,000 para sa saiyang temporamenteng libertad.
21 anyos man na akusado an naarestar sa Brgy. Centro Occidental na binistong si alyas “Mark” asin residente kan Zone 3, Brgy. Santicon.
Nadakop ini sa kusog kan mandahamiento de aresto para sa kasong pagbalgar sa Section 5-B kan RA 7610 o pang-aabuso ki aki.
Tinalaan man kan korte an dosyentos mil depesos na kantidad ki piyansa para sa saiyang paramientras na libertad.
Mientrastanto, sarong alyas “Leron” an inarestar kan mga otoridad sa sinagibong gun buy-bust operation sa Purok 3, Brgy. Balinad.
An suspek, 33 anyos na residente kan Purok 3 kan Brgy. Magurang.
Sa nasambit na operasyon, nakumpiskar an sarong Kalibre 38 revolver na may laog na apat na bala.
Nakumpiskar pa saiya an 5 sachet ki pinagtutubudang shabu, buy-bust money, 3 lighter, 4 na cellular phones, P5,000 na cash asin sarong motorsiklo.
Sa ngunyan, an tulong naaarestar na mga persona, nagtetenir na sa kustodiya kan pulisya para sa magkakanigong disposisyon.
