LEGAZPI CITY – Arestado kan mga otoridad an magtugang asin duwa pang kaibahan kaini kun sain saro digdi an menor de edad makalihis maaktuhan sa pot session sa Purok 4, Brgy. San Roque, syudad kan Legazpi.
Segun sa report, sinagibo an operasyon makalihis na mag-report an sarong ina na may darang hinabunan na IPhone an saiyang aki.
Huli kaini, kairibahan an ina, tulos na nagpasiring an personahes kan Legazpi CPS sa harong kan kabarkada kan aki na pirmi su boot kaining pigtatambayan.
Naabutan ninda sa harong an mga magkabararkada na magkahampang na nakatukaw, mantang sa tahaw ninda an sarong pulang tray na naglalaog nin drug paraphernalia asin selyadong sachet nin iligal na droga na may timbang na poko mas omenos 0.05 grams.
Nasa kustodiya na an mga ini kan Legazpi CPS para sa magkakanigong disposisyon.
