NAKATALA og tulo ka kaso sa sakit nga dengue ang Barangay Fatima, GenSan karong bulan sa Setyembre kini ang gikompirma ni Kapitan Reynante Curit.
Matud sa opisyal luyo sa padayon nila nga oplan galugad ug oplan kulob sa lugar apan dili gihapon matud pa malikayan nga adunay mga lamok nga magdala sa sakit nga dengue. Gikasubo niini ang panghitabo tungod sagad sumala pa sa mga nagsakit mga bata.
Nag-awhag karon ang Kapitan sa mga lomolupyo sa lugar nga ibatasan ang pagpanghinlo sa palibot, ug dili magpondo og tubig sa mga butnganan nga puwedeng kaitlogan sa mga lamok. Nasayran nga ang Purok sa Fatima kung asa natala ang sakit nga dengue milabay nga mga bulan susama sab nga lugar natala ang bag-ong kaso.
Tungod niini, takda na sab nga magpahigayon og clean-up driver ang mga Barangay Health workers aron ma-sprayhan ang mga puy-anan sa lamok nga makadala og sakit sa mga tawo. I Enamie Mogpon
