Sikop sa mga sakop sa Davao City Police Office (DCPO) ang tulo ka drug suspek atol sa tulo ka managlahing anti illegal drug operations sulod sa 24 oras, gikan Mayo 19 hangtod Mayo 20 ning kasamtangang tuig.
Nunot kini sa padayong paningkamot sa kapulisan sa kampanya batok iligal nga droga sa dakbayan sa Davao, ilawum sa pagdumala ni DCPO, City Director, Pcol Richard Bad-ang.
Malampuson matod pa nga nasikop ang mga suspek human napalit ug nakuha kanila ang nagkadaiyang gidak-on nga pakete sa iligal nga droga.
Atol sa operasyon, nasakmit gikan kanila ang kinatibuk-ang kantidad nga mubalor sa Php9,200.40.
Balhog na karon sa prisohan ang nahisgutang mga dinakpan ug gi-andam na ang pagpasaka og tukmang kaso batok kanila.
Samtang, gipasalig sa DCPO nga dili sila mohunong sa pagsumpo sa iligal nga droga sa dakbayan sa Davao pinaagi sa tabang sa komunidad sa pakigtambayayong sa lokal nga panggamhanan ug Brgy officials.
