BICOL – KASUNOD kan kumpirmasyon kan World Health Organization o WHO na nagtapos na an polio outbreak sa nacion, inanunsyar kan DOH-Bicol na naging matrayumpo man an ikaduwang ornada kan pagbabakuna kontra polio sa rehiyon.
Segun sa Department of Health-Bicol, sa ibong kan pandemya nagibo pang makapag immunize nin maabot sa 291,000, o 78.48% kan mga target eligble children sa 2nd roundkan Bivalent Oral Poliomyelitis Vaccine Supplemental Immunization Activity (bOPV SIA).
An nasabing kabilugan na porsyento an harani sa herd immunity threshold na 80%.
Magigiromdoman na isinagibo an ikaduwang round kan pagbabakuna puon Mayo dyes y siete hasta trenta y uno kan presenteng taon kun saen target an 370,806 na mga kaakian asin omboy edad 0 hasta singkwentang meses.
Mantang an non-selective mass OPV Supplemental Immunization Activity an isinagibo man sa mga piling siyudad asin munisipalidad sa rehiyon tanganing makamtan an herd immunity kontra polio.
Mantang, aminado man si Dr. Monrey Isaiah Mancilla, National Immunization Program Regional Medical Coordinator na dakul na mga pagbalo dara kan presenteng panahon an inatubang kan mga healthworkers siring man kan mga magurang kun kaya labi labi an pasasalamat sa mga ini sa pagtatrayumpo kan aktibidad asin sinabing parte an gabos kan makasaysayang pagtatapos kan Polio outbreak sa Pilipinas.
Sa ginibong bOPV SIA nagamit an mga tadang OPV sa isinagibong Immunization Activity kan nakalihis na taon rason tanganing mayong masayang na bakuna asin magkaigwa nin dugang na proteksyon an mga kaakian na Bicolano kontra sa mga preventable diseases siring kan polio.
