ILOILO CITY – Nakapag aresto ro Police Regional Office (PRO)-6 it kabilugan nga 2,591 bangud sa illegal nga sugae sa Western Visayas sa sueod it an-um nga buean.
Suno kay Police Brig. Gen. Sidney Villaflor, PRO-6 acting director, naaresto ro mga raya halin sa nagkasari-sari nga police units sa 814 anti-gambling operations halin it January 1 hasta June 25 kaangot sa direktiba ni Philippine National Police (PNP) chief Police Gen. Benjamin Acorda Jr. agud pabaskugon ro kampanya kontra sa illegal nga pagsugae.
Ginhayag ni Villaflor nga ro 2,591 nga mga naaresto halin sa probinsya it Aklan, Antique, Capiz, Guimaras, Iloilo, ag Negros Occidental kamana man sa syudad it Iloilo ag Bacolod hay kaeakip sa masobra 41,000 katawo nga nadakpan sa bilog nga nasyun sa sueod it haeos an-um nga buean.
Samtang, ginhayag ni Police Major Grace Borio, PRO-6 spokesperson, nga umabot sa haeos P600,000 nga pusta ro narekober halin sa mga illegal nga nagasugae. // ANN DESLENE SALAZAR
