Nagpadayon ang pagbakuna sa mga personahe sa Gensan-Fishport pinaagi sa City Health Office nga nagsugod Hulyo 24 hangtud 28, 2021.
Kahinumduman nga atol sa pagbisita sa Gensan ni National Task Force against COVID-19 Chief Implementer ug Vaccine czar, Sec. Carlito Galvez Jr. kaniadtong Hulyo 20, gibutyag niini nga prayuridad nila nga mabakunahan ang mga personahe sa Fishport gumikan sa kadaghang tao nga gaadto didto matag adlaw.
Dugang pa niini, dako og posibilidad nga masudlan ang Gensan sa Delta variant tungod sa mga Indonesian ug Malaysian nga mananagat nga gasulod sa siyudad kung asa dunay natala sa ilang lugar nga kaso sa nasangpit nga mas makatakod nga virus.
Matud ni Marife Quiam, Presidente sa Phil Export Region XII ug vaccination manager sa Fishport, anaa sa kapin 11,000 ang populasyon sa Gensan Fishport ug target nilang bakunahan ang 500 registered personnel matag adlaw sulod sa lima ka adlaw sa Market 1 nga usa sa mega vaccination site sa siyudad.
Sa karun dunay 5,000 Sinovac vaccines alang sa 2,500 fishport personnel.
Dako ang pasalamat ni City Health Officer, Dr. Rochelle Gajete-Oco sa suporta sa fishport management ug gipasalamatan usab niini ang mga personahe sa kagustan nga mabakunahan alang sa ilang proteksiyon batok COVID-19.
Photo: Personahe sa Gensan-Fishport nga usa sa mga naturukan sa Sinovac vaccine.
