Gibutyag sa Department of Agriculture XI nga labihan na ang gihatud nga epekto sa African Swine Fever sa hog/swine industry sa Davao Region sulod sa duha ka tuig niini nga pag-igo.
Subay sa datus nga gipakita ni Dr. Karl Laurence Pineda, Livestock Coordinator sa Department of Agriculture XI sa technical working group sa Regional Disaster Risk Reduction and Management Council XI, musumada na sa 49,315 ka baboy ang gipangpatay.
Kini gipanag-iyahan sa 10, 664 hog farmers sa 237 ka barangay sa 43 ka munisipyo sulod sa lima ka probinsya sa Davao region lakip na ang Davao City.
Pinakadaghang naapektuhan ang Davao Occidental nga adunay 5,669 hog raisers; 1,138 sa Davao de Sur; 1,259 farmers sa Davao City; 1,068 sa Davao del Norte; 106 sa Davao de Oro ug 1,424 farmers sa Davao Oriental.
Moabot na usab sa kinatibuk-ang P172, 535,000.00 ang na-release sa DA-XI alang sa indemnification o bayad alang sa mga apektadong hog raisers.
Luyo niini, giangkon sa ahensya nga nagpabilin ang dakong bahad sa ASF ilabi nang Agosto 13, 2021 nakatala ang Mati City og kaso apan dali nga naglusad og total disinfection ang LGU.
Gidayeg usab sa ahensya ang managsamang paningkamot sa tanang apektadong LGU sa pagmugna og mga balaud ug pag-establisar sa mga lakang kon biosecurity measures nga mopakgang sa pagkaylap sa ASF sa ubang lugar.BNFM-DAVAO
