MOKABAT na sa 2,217 gikan 29,383 ka mga senior citizens sa GenSan ang nabakunahan sa first dose gamit ang Sinovac vaccine.
Kini segun sa City Health Office nga mokabat sa 7.55 percent ang nabakunahan nga mga senior citizen sa syudad apan nagpadayun pa ang vaccination sa maong sektor.
Segun ni April Maquilang, immunization coordinator sa City Health Office nga walay kabag-uhan sa vaccination sites sa mga senior citizen apan usa na lang ka mall ang venue site sa vaccination ug nanghinaut nga daghan na ang magpabakuna.
Nasayran nga naundang ang pagpabakuna sa mga senior citizens tungod nahurot ang suplay ug dihang miabot na ang alokasyon, subli kining gipahigayon.
Gihulat pa usab karon sa CHO ang alokasyon sa bakuna alang sa mga adunay comorbidities o kadtong may mga sakit nga naapil sa priority list A3.