LEGAZPI CITY – Natudukan na ki libreng antibiotic vaccine kan City Veterinary Office sa pamayo ni Dr. Emmanuel Estipona an duwang liver line shih tzu na pinutulan nin talinga kan su boot parahabon sa Brgy. Bagumbayan, Legazpi City kan nakalihis na Marso 20.
Sa intrevista kan Brigada News FM Legazpi kay Maris Icleo Ebrada Aguilar, owner kan duwang shih tzu, sinabi kaini na natudukan na nin first dose kan antibiotic vaccine an saiyang duwang ataman asin mabalik pa sinda para sa ikaduwa asin pantulong dose kan bakuna.
Marurumduman, kan nasambit na aldaw, naabutan kan owner sa laog kan saindang harong an duwang shih tzu na sinda Luna asin Bonbon na duguan, maluya asin putol na an mga talinga.
Dugang pa niya, nagkaigwa nin trauma an duwa niyang ataman, kun sain nagtatakig an mga ini kapag nakakamati ki boses nin lalaki.
Nai-report naman an insidente asin nagahagad man ki kopya nin CCTV sa barangay an owner nganing mabisto an suspek, mantang pagirumdom man niya sa publiko, kun maharale sa harong, dai pagbayaan an mga ataman asin kun kaya man sana, iiba na sana sa mga dudumanon. | Brigada Intern HANNAH JAMILA BITAGO
