Nadakpan ang duha ka myembro sa New People’s Army (NPA) sa gihiusang pwersa sa 1003rd Brigade ug narekober ang 4 ka armas sa Sitio New Laslasakan, Barangay Palma Gil, Talaingod, Davao del Norte.
Ang mga nadakpang NPA giila nga sila Masarinda Balite, alyas Alina, usa ka medical and supply officer sa Sub-Regional Guerilla Unit, Sub-Regional Committee, ug si Odessa Dumol alyas “Ann” kinsa nadakpan human nga misulay og ikyas kauban pa ang laing 10 ka rebelde atol sa engkwentro tali sa 56IB, 27IB ug 3IB.
Sumala ni Colonel Consolito Yecla, Commander of the 1003rd Brigade, nagsugod ang engkwentro batok sa mga NPA human nga mibalibad ang grupo ni alyas Macky nga musurender og dawaton na lamang ang tanyag nga peace program sa gobiyerno.
Nakumpiska ang 3 ka M-16 rifles, usa ka M-4 rifle samtang ang mga dinakpan padayon pa nga nagpa-alim.
Misurender usab sa sabakan sa gobiyerno ang duha ka kanhi NPA nga sila Nester Tausan, alyas Bong, usa ka supply officer sa Squad Primera Andoy sa SMRC, 19-anyos, residente sa Sosambulongan, Palma Gil, Talaingod, ug si Wena Teklonay, alyas Sirena, usa ka the Supply Officer sa Platoon Basil sa SMRC, 18 anyos, ug residente sa Somuling, Gupitan, Kapalong, Davao del Norte.
Padayon nga nanawagan si Col. Yecla sa mga NPA nga mubalik na sa sabakan sa balaod aron hingpit nang makasinati og hapsay ug haruhay nga kahimtang nga kinabuhi kauban ang ilang pamilya pinaagi sa mga gipangtanyag nga programa sa gobyerno ubos sa Enhanced Comprehensive Local Integration Program. BNFM-Davao
