Nagreklamo muli sa Brigada News FM si ginoong Jose Romeo S. Ko matapos mabawi sa nanghiram ang kanyang dalawang motorsiklo mula sa Barangay Sta. Monica, Puerto Princesa City.
Ayon kay Ko, nabawi niya na ang dalawang motorsiklo ( KMX Kawasaki at YZ Yamaha) kamakailan pero nadismaya siya nang malaman na may mga nawalang piyesa dito.
Isang Benjamin Estropia ng Barangay Sta. Monica ang nanghiram sa kanya para umano sa karera noong Enero 2020 subalit dahil sa pandemya ay hindi natuloy ang motocross.
Paliwanag umano sa kanya ni Benjamin ay nasa shop lang nito ang mga nawawalang spare parts at iti-turn over na lang daw sa barangay pero hanggang ngayon ay hindi pa ito naibabalik.
Iginiit ni ginoong Ko na dapat ibalik sa dating itsura ng kanyang motorsiklo dahil kung hindi ay itutuloy niya ang reklamo kay Benjamin sa barangay.
Samantala, tumanggi na magpaunlak ng panayam sa Brigada ang inirereklamo.
