Tumaas sa 50 ang bilang ng mga miyembro ng Lakas-Christian Muslim Democrats (CMD) sa House of Representatives matapos ang pagsali ng dalawang mambabatas sa partido.
Sa isang pahayag ay sinabi ni House Majority Leader at Leyte 1st District Representative Martin Romualdez na kasama na sa partido sina La Union 2nd District Representative Sandra Eriguel, Chairperson ng House Inter-parliamentary Relations and Diplomacy, at Nueva Vizcaya Lone District Representative Luisa Lloren Cuaresma.
Papalitan rin ni Eriguel sa pwesto si dating Lakas-CMD Vice President for Health Services Willie Ong, na nasa ilalim na ngayon ng Aksyon Domkratiko party, matapos nitong pumayag na maging running mate ni Manila Mayor Isko Moreno para sa 2022 elections.
Kaugnay nito ay itinalaga naman si Cuaresma bilang Vice President for Local Government Concerns ng Lakas-CMD.
Samantala, sumama na rin sa partido ang negosyante na si Katrina Ponce Enrile, na anak ni dating Senate President Juan Ponce Enrile.
Mababatid na tatakbo si Katrina bilang 1st District Representative ng Cagayan sa ilalim ng Lakas-CMD.
