LEGAZPI CITY – Arestado kan mga otoridad an duwang lalaki sa pigkondosir na operasyon kontra iligal na droga sa Purok 9, Sitio Malada, Brgy. Malabog, banwaan kan Daraga, Albay.
Binisto an mga suspetsado na sinda Alvin Morcoso y pandaan, 45 anyos, may agom, driver asin residente kan nasambitan na lugar, asin si Reginaldo Arcanghel y Vejerano, 45 anyos, nyudo, warang trabaho na residente kan Brgy. Sto. Nino, banwaan kan Jovellar.
Susog sa report, pigkondosir an nasambitan na operasyon kan Daraga MPS, kaibahan an Albay PPO asin iba pang unit sa pakikipagtabangan sa PDEA Bicol na ikinaarestar kan mga suspetsado.
Nakumpiskar sa operasyon an sarong heat-sealed transparent plastic sachet nin pigtutubudang “shabu” na pigkakalkulong 5grams an timbang sa kantidad na PHP20,000.
Apwera kaini, nakumpiskar pa sa control kan saro sa mga suspetsado an onseng darakulang heat-sealed transparent plastic sachets asin siyam na heat-sealed transparent plastic sachets nin kaparehong item na igwa nin pigkakalkulong timbang na 60 grams na nasa kantidad nin PHP400,000.
An mga ini, kaibahan an mga nakumpiskar na mga ebidensya, nasa kustodiya na kan mga otoridad para sa magkakanigong disposisyon.
