Ginpasakaan eon it kaso ro daywa katawo nga nadakpan it baril ag talibong sa may Poblacion Libacao, Aklan ku Hulyo 6 bandang ala una it kaaganhun.
Ginkilaea ro mga nadakpan nga sanday Paul Asiong 23yo ag John Onao 22yo nga parehung mga taga Brgy. Loctuga sa nasambit nga banwa.
Sa interview it Brigada News FM Kalibo kay Patrolman Reymark Labrador it Libacao MPS, nakabatun sanda it tawag halin sa sangka concerned citizen nga naga imporma nga nakita nanda si Onao nga may bitbit nga talibong.
Insigida man nga rumesponde ro Libacao PNP ag kinumpiska ro daea nga talibong ni Onao, pero kat usisaon ro kaibahan kara nga si Asiong hay naboe-an man raya it sangka homemade shotgun nga may naka load nga sangka bala ag sambilog pang reserba nga bala.
Base segun sa daywang ka suspek, may daea sanda nga mga armas bilang self-defense bangud napabahin sanda sa pamilya it ‘ubusan ng lahi’.
Sa makarun hay nagapangatubang si Asiong sa kasong pag eabag sa RA 10591 Comprehensive Firearms and Ammunition Regulation Act samtang si Onao hay kinasuhan it pag eabag sa Batas Pambansa Blg 6 o Illegal Possession of Bladed, Pointed o Blunt Weapons. // ANN DESLENE SALAZAR
