LEGAZPI CITY – Duwa katawo an nadakop sa pigkondusir na drug buy-bust operation sa duwang magkasuway na syudad sa probinsya kan Albay kasuudma.
Sa Purok 2, Brgy. Tuburan kan Ligao City, nadakop si alyas “Erwin”, 45 anyos, may agom, paratinda na residente kan Purok 1, Brgy. Layon kan kaparehong syudad.
Sa report, an Ligao CPS katabang an PDEA Regional Office 5, nagkondusir nin operasyon kontra iligal na droga na nagresulta sa pagkakadakop kan nasambit na suspetsado.
Nakumpiskar digdi an 6 na sachet nin pinagtutubudang shabu, kaiba na digdi an buy-bust item na may pigkakalkulong timbang na 1 gram na may kantidad na PHP6,800.
Kaiba pa digdi an buy-bust money na PHP500 bill asin sarong itom na Honda Bravo motorcycle.
Mantang, sa pension house sa Purok 4-B kan Brgy. Rawis sa Legazpi City, sarong alyas “Ogie” an naarestar kan mga otoridad, 27 anyos na residente kan Purok 4. Brgy. Pigcale kan kaparehong syudad.
Basado sa impormasyon, naarestar ini kan pinagsarong esfuerso kan PDEA Albay asin Legazpi CPS sa pakikipagtabangan sa PDEA Regional Office 5 sa paagi kan kaparehong operasyon.
Pinabakalan kan suspetsado an poseur buyer nin sarong sachet nin pinagtutubudang shabu na may pigkakalkulong timbang na 6 grams na may kantidad na PHP4,080.
Nanlaban an suspetsado asin binalong dumulag sa paagi kan pagsuntok kaini sa bintana asin pinwersang bukasan asin luminukso paluwas sa edipisyo alagad tulos man ining nadakop.
Sarong sachet pa nin shabu an nakua kan mga otoridad sa semento; mantang nakakua man sinda nin 3 pidasong PHP500 bill asin sarong PHP1,000 bill na buy-bust money sa parking space kan sarong kwarto.
Apwera kaini, 2 pidaso nin aluminum strips na pigtutubudang may drug residue, 2 pidaso nin improvised na aluminum needle asin disposable na lighter an nagkakurua sa kwarto na inokupar kan suspetsado.
An duwang mga naarestar na suspek, kapot na kan mga otoridad para sa magkakanigong disposisyon.//
