Ginkaalarma sang mga pumuluyo sang Barangay Punta Tabuc ang hinali nga pagpundo sang duha ka katapo sang Capiz Maritime Police sa ila lugar kag nagpanaya sang armas-luthang.
Ginkilala ang duha ka maritime police nga sanday Patrolman Mike Vincent Yago kag Patrolman Dennis Sevilleja, lunsay residente sang Ilocos Norte kag na-assign sa Barangay Culasi, Roxas City.
Sa interview sang Brigada News Team kay Police Lieutenant Semdan Sitchon, hepe sang Capiz Maritime Police, sandig sa nangin pahayag sang iya duha ka tinawo, samtang ginasubay sang mga ini ang dalanon sakay sa motorsiklo nga ginamaneho ni Sevilleja, sang nalabayan nila ang isa ka lalaki nga nagalakat sa tunga sang karsada rason nga ginbadlong sang mga ini nga magpahigad, apang sa baylo nga magpati ginapahayag ginpakit-an pa sila sang lalaki sang armas-luthang nga nakasukbit sa iya kilid.
Samtang suno naman kay alyas “Nene”, ginpahayag sini nga yara sila nagatambay sa waiting shed kag naga-uloistorya sang iya mga kaupdanan sang hinali lang nagpundo ang motorsiklo sakay ang duha ka pulis kag gintutukan sila sang armas luthang.
Dugang pa sini, nga yara sa impluwensiya sang makahulubog nga ilimnon ang duha.
Bangud sa ila kahadlok, ginpulihan kastigo sang pila ka residente si Yago nga may hawid nga armas luthang.
Nag-angkon sang kapilasan sa lawas si Yago samtang si Sevilleja ang nagpalagyo matapos ginbayaan ang iya upod.
Nahibaluan nga nagikan sa Camp Crame ang duha ka pulis kag bag-ong download lang sa Capiz Maritime sang Nobyembre.
Nagpangayo naman sang pasaylo ang hepe kay Punong Barangay Nestor Buenviaje matapos ang nagluntad nga kinagamo kag nagapromisa nga indi sini pag-itolerar ang ginbuhat sang duha kag pagadisplinahon ang iya tinawo. | Judy Ann Juare
