NAKA KUSTODIYA karon sa Lagao Police Station ang duha ka driver sa usa ka sakyanan nga naga deliver og ice cream human nga nagsumbong nga gitulis apan kadudahan ang ilang mga pahayag sa pulis.
Sa report sa Lagao PNP alas otso pasado sa gabii adlaw nga Lunes Pebrero 19 nagpatala ang duha ka sakay sa L300 van ug nagsulti nga sila na biktima sa mga tulisan sa Purok 18, Brgy. Lagao.
Gibabagan daw sila og motorsiklo nga XRM unya gitiunan og pusil, unya gikuha ang ilang koleksyon nga mokabat sa P72,726 lakip duha ka cellphone unya nisibat padulong sa Conel Road ang mga suspetsado.
Giimbestigahan sa kapulisan ang impormasyon apan dili sumala pa magkasibo ang mga pahayag sa duha ka gikaingong biktima.
Sa gihimo nga inspection sa ilang kagamitan may nakuha nga tulo ka libo sa usa nga si alyas Mar unya duha ka libo sa bulsa ni alyas Tol.
Nagdudu pa gayud ang kapulisan human nakita sa medyas ni alyas Tol ang P4,250 nga kwarta.
Gumikan niini gipangita sa pulis ang ilang trabahoan unya ang hukom mopasaka og kasong kawat sa duha ka nag report nga gitulis. I Ver Diazon
