Arestado ang duha ka persona matapos nakuhaan sang apat ka armas-luthang kag iligal nga droga sa implementasyon sang search warrant sa Medalla Milagrosa Ville, Barangay Timpas, Panitan, Capiz.
Ginkilala ang mga nagkaladakpan nga sanday Francis Eugene Catalan, 28-anyos, residente sang nasambit nga barangay kag alyas Mar, 16-anyos sang Barangay Poblacion Ilaya sang nasambit nga banwa.
Narekober sa posisyon nanday Catalan kag Alyas Mar ang apat ka unit sang cal. 38 nga armas-luthang, mga bala kag 23 ka sachets sang ginapatihan shabu nga ginabanta nagabalor sang P136,000.
Si Catalan ang gin-implementaran sang duha ka search warrant nga gin-isyu kag ginpermahan ni Executive Judge, Esperanza Isabel E Poco-Deslate sang Regional Trial Court, 6th Judicial Region, Branch 19, Roxas City, napetsahan sang July 11, 2023.
Sa karon, nagapabilin ang duha ka suspetsado sa Panitan PNP kag natalana nga pasakaan sang nagakaigo nga panumbungon. | Judy Ann Juare
