Padayon nga gi-obserbahan suld sa Mandaue City District Hospital ang kahimtang sa duha ka lalaki nga mga signage installer kinsa nanga-angol og dunay mga paso ang kalawasan human nakurentihan og nahagbong atol sa ilang pagtaod og signage sa H. Franco Bldg., Tipolo, Mandaue City, pasado alas 6 kagabii May 21, 2024.
Nailhan ang mga nakuryentihan nga sila si Elesio Lagaras, 40 anyos , minyo, nagpuyo sa sitio Negative, barangay Cambaro, Mandaue City, usa ka Signage Installer sa DIGI-M Graphics Design nahimutang sa Doña Carmen Bldg., Kasambagan, Cebu City ug Anton Parawan Nudalo, 33 anyos taga Purok Ampalaya, Cambaro sa dakbayan sa Mandaue
Ang mga personnel sa Mandaue Police Station 2 sa Mandaue City Police Office daling mi responde sa paghitabo human makadawat og tawag sa nagpahibawo sa nagpakabana nga saksi sa maong panghitabo.
Nasuta sa mi responding kapulisan base sa pamahayag sa saksi kinsa maoy nag-supervise sa pagbutang sa school advertising signage sa atubangang bahin sa nahisgutang building nga human sa 10 minutos nga pag-instalar kalit nga mikilab ang mga wire sa kuryente duol sa nahimutangan sa mga biktima ug iyang nabantayan nga nahulog sa yuta ang lalaki nga trabahante.
Gitawag dayon niya ang atensyon sa kauban sa trabaho sa installer ug gihangyo nga i-verify sila ug gipahibalo usab ang iyang labaw sa eskuylahan bahin sa nahitabo nga insedente.
Dali hinuong naka responde ang mga personnel sa Bantay Mandaue – CDRRMO ang mihatod sa pampublikong tambalanan sa dakbayan sa Mandaue alang sa dinaliang pag-atiman sa duha ka mga biktima.///
