Naghaguros ang dagan sa pribadong sakyanan nga gimaneho sa usa ka edaran nga lalaki, gani diriyot maka igo sa gikasugat nga motorista sa wala pa kini malahos sa pangpang samtang nagtadlas sa dulhogon nga karsada sa Lower South Hills Barangay Tisa, Cebu City Lunes sa hapon Huly 22, 2024.
Nasaksihan ini ni Eric Parba, kinsa nag maneho sa motor nga nakasugat sa pribadong sakyanan nga nadisgrasya. Si Parba mao nay mipahibawo sa mga Tanod sa Barangay Tisa.
Matud ni Simeon Babao, residente nga daling nakasusi sa hitabo ug nakasaksi dihang gi rescue ang duha ka sakay nga pulos lalaki, ilang nakita nga naglisud na sa pag ginhawa ug nagkirig kirig ang drayber samtang ang sakay wala kaayo ma grabihi.
Daling gihiktan ang sakyanan og pisi ngadto sa poste aron dili kini makahatag og peligro ngadto sa usa ka balay nga naa sa aubos nga bahin og dili maka angin og kinabuhi sa laing tawo.
Matud nila ni Ralph Dela Cerna ug Perlito Goña ang duha ka Barangay Tanod sa Barangay Tisa, ang duha ka biktima gisakay sa Cebu City Ambulance og gidala sa Cebu City Medical Center.
Giingon nga taga Duljo Famita sa dakbayan sa Sugbo ang drayber nga mihatod sa iyang babayeng trabante sa South Hills. Sa pagbalik na niini misakay ang bana sa iyang gihatod nga trabahante og nahitabo na ang disgrasya.
