Arestado it mga tawuhan it Balete Municipal Police Station ro sangka indibidwal bangud sa pag eabag sa COMELEC Resolution 10918, nga nagabawae sa pagdaea it mga makamaeatay nga armas sa mga pampublikong lugar sa tiyempo it eleksyon.
Ro suspek hay sangka 18-anyos nga residente it Sito Talangban, Brgy. Camaligan, Batan, Aklan.
Natabo ro pag-aresto sa Brgy. Poblacion, Balete Aklan, sa sangka routine beat patrolling, bilang kaparte it security deployment para sa Miss Enchanting Balete Advocacy Presentation, nga kabahin it sang buean nga selebrasyon it 13th Enchanting Balete Festival.
Naboe-an ro suspek it kutsilyo nga may kapin sa 14 pulgada ro haba.
Nagaguwa sa imbestigasyon nga owa imaw it legal justification halin sa COMELEC nga magdaea it nasambit nga armas sa panahon it eleksyon.
Insigida man nga ginkustodiya ro suspek sa Balete MPS kaibahan ro narekober nga kutsilyo para sa nagakaigu nga disposisyon. // ANN DESLENE SALAZAR
