GIKOMPIRMA ni Noria Mudia Spokesperson sa Fungolngabong Mudia clan Association sa Barangay labangal nga kapin 16 ka balay ang naguba sa demolition team nga gipangunahan nilang Ronilo Taculod ug Col. Rimpos.
Matud ni Noria nagsugod ang demolisyon ala una sa hapon sa Huwebes, Marso 24, dihang kalit nga miabot sa lugar ang grupo ug adunay bitbit nga mga hinagiban.
Tungod sa pagpangguba sa mga balay usa sa myembro sa demolition team ang naigo sa pagpamusil mao si Jasim Mudan Alip, 23-anyos minyo, ug residente sa Purok Minanga, Buayan, Gensan.
Gidugang ni Noria usa sa myembro sa demolition team ang nagbitbit matud pa og request letter kung asa adunay pirma ni City Administrator Atty. Arnel Zapatos nga nagtugot sa grupo nga magpahigayon og demolisyon sa nasangpit ga lugar.
Atol sa panghitabo dali nga nagpatabang sa kapulisan ug sa Task Force Gensan ang mga residente ug gilayon kining girespondihan. Tungod niini daghan nga pamilya ang apektado ug namakwit palayo sa lugar aron makalikay sa kasamok.
Sama ni Darwin Alombro nga nakasaksi sa panghitabo nga giguba ang iyang balay sa mga armadong grupo. Wala siyay nabuhat tungod sa kahadlok ug gipanghakot na lamang niini ang tanang gamit lakip niyang gi-safety ang iyang tibook pamilya. Nanawagan karon si Noria sa lokal nga panggamhanan sa syudad nga mahatagan og aksyon ang nahitabong kaguliyang. I Enamie Mogpon
