12,600 ka mga pamilya o 49,400 ka mga indibidwal ro naapektuhan it maeaparan nga kasamaran nga gintuga it super typhoon “Odette sa probinsiya Aklan.
Base sa inisyal nga report it Provincial Risk Reduction and Management Council (PDRRMC) ku Disyembre 18, masobra P17-milyong nga balor it imprastraktura ag agrikultura ro nakaangkun it kasamaran.
Ro mga kabanwahan pa eang it Banga ag New Washington ro nakasumite it report it pinsala sa sektor it agrikultura ag imprastraktura.
Nasamad man ro seawall it New Washington. Umabot man sa P761,320 ro pagkalugi sa mga pananom it saging, niyog, ag gulay sa nasambitan nga banwa.
Ro Buruanga ro may pinakamaabo nga numero it mga apektado nga indibidwal nga nagaabot sa 20,905; ginsundan man raya it New Washington nga may 6,821; Nabas nga may 5,285; Malay nga may 2,337; Balete nga may 2,264; ag Numancia nga may 2,160.
Apektado man it bagyong “Odette” ro mga residente it Makato, Tangalan, Batan, Kalibo, Madalag, Ibajay, Malinao, Banga, ag Libacao./JIL B. LACSON
