Nakatala karon ang Department of Education-XI og 96 ka magtutudlo sa Davao Region ang natakbuyan sa Covid-19, dungan sa pagsugod sa klase sa miagi nga Lunes Setyembre 13, 2021.
Gawas sa mga teachers, gibutyag ni DepEd-XI Spokesperson Jenielito “Dodong” Atillo nga adunay 34 ka non-teaching personnel, duha ka principal ug usa ka estudyante ang nataptan sa virus.
Samtang gikumpirma sa opisyal nga mamahimong ipadayon sa matag local government unit ang paggamit sa mga eswelahan isip mga isolation/quarantine facilities ug vaccination sites sanglit wala pa gitugutan ang face-to-face classes.
Apan gitataw ni Atillo nga dunay mga magtutudlo sa mga gigamit nga tulunghaan ang gibalhin sa pinakadool nga eskwelahan nga mas kumbinyente kanila depende sa learning modality sama sa modular learning aron dili malisdan sa module reproduction/distribution ug retrieval.
