Nakatala og dugang 13 ka mga bag-ong kaso sa Covid-19 Delta Variant ang Central Visayas.
Kini basi sa labing uwahing datus nga gipagawas sa Department of Health (DOH-7).
Sa nadugang nga mga kaso 2 lang niini ang naggikan sa dakbayan sa Sugbo samtang ang nahabilin gikan sa nagkalain-laing mga probinsya sa rehiyon.
Gumikan niini, miabot na sa 128 ang kinatibuk-ang ihap sa mga natalang kaso sa Delta Variant sa Rehiyon-7.
Matud ni Dr. Mary Jean Loreche, ang Chief pathologist sa DOH-7, nga ang nahisgutang resulta nakuha gikan sa mga sample nga gipailawm sa genome sequencing sa Philippine Genome Center sukad niadtong Agusto 22 hangtud sa Agusto 29 ning tuiga.
Apan gipagawas ang resulta niini niadtong Oktubre 10.
Dugang ni Loreche nga nakarekober na gikan sa sakit ang mga nataptan niini sanglit dugay na man gipahigayon ang contact tracing ug quarantine.
