Gintupok sang kalayo ang 12 tanan ka ready-to-wear (RTW) stalls nga nahamtang sa sulod sang Panitan Public Market sa Barangay Tabuc Sur, Panitan, Capiz, pasado alas-9:30 kagab-i, Hunyo 15.
Ginkilala ang mga tag-iya sang nasunog nga baligyaan nga sanday: Jessie Catalan; Rosalie Bechayda; Jesus Vasquez; Danilo Dadivas; Jessel Vivas; Ricky Depaur; Jolas Dela Cruz; Lorenza Dela Torre; Jose Diva; Nely Diva; Mariah Gabrielle Pauline Dadivas; kag Elena Dordas.
Sandig sa impormasyon nga nakuha sang Brigada News FM kay SFO2 Vincent Meñez, sang BFP-Panitan ginpahayag sini nga may nagpadulong sa ila estasyon kag nagpahibalo nga nagakasunog na ang pila ka baligyaan sa sulod sang merkado.
Suno kay Meñez, madasig nila ini nga ginrespondehan kag sa bulig man sang BFP-Pontevedra kag Loctugan fire sub-station natigayon nila nga napalong ang kalayo.
Dugang pa sini, isa diri ang totally-damaged samtang ang 11 ka iban pa ang partially-damaged.
Mahibaluan nga naglab-ot pa sa 2nd alarm ang sunog antes na-deklarar nga fire-out takna alas 10:15 sang gab-i.
Kapin P300,000 ang inisyal nga kahalitan nga natuga sang sunog samtang maswerte naman nga wala sang napatay ukon nasamaran. Sa karon, padayon ang imbestigasyon sang mga otoridad agud mahibaluan ang gintunaan sang kalayo. | Judy Ann Juare
