Gikumpirma mismo sa mga otoridad ug kabanay nga nakabsan na sa kinabuhi ang usa ka senior citizen nga nalukong sulod sa nasunog nga balay diha sa Tiano – Kalambagohan – Velez St., Barangay 14 syudad sa Cagayan de Oro.
Naila ang biktima nga si Antonio Tony Galpo, gibana-banang anaa sa 60 anyos ang pangidaraon, diin giingong wala na kagawas ang biktima tungod kay bedridden na kini.
Gawas sa nakabsan sa kinabuhe, dunay 2 katawo nga na-injured kinsa nagpaalim na karon sa balay tambalanan.
Subay niini, gibutyag ni City Fire District Spokesperson and Investigator SFO4 Samson Velarde, nga naugdaw ang usa ka balay, nga laing-lain ang nagpuyo.
Dugang pamahayag ni SFO4 Velarde, nga kinahanglang ipailawom sa autopsy sa ang patayng lawas sa biktima, apan gipasabot nga mismong pamilya na ang mihangyo nga dili na kinahanglan, aron mahiluna na ang patayng lawas sa biktima.
Sa kasamtangan, nagpadayun ang gihimong imbestigasyon sa Bureau of Fire Protection sa nahisgutang insidente. -END-
