San Jose, Antique – Patay ron kang gindara sa ospital ang sangka persona samtang pilasun naman ang tatlo ka iban pa, lunsay mga sakay kang tricycle kang dya ang aksidente nga masag-idan kang sangka multicab duag skyblue nga ginamaneho kang wara pa makilala nga persona sa Barangay Yapo, Barbaza, Antique, las-2:20 kadya nga hapon, Mayo 22, 2024.
Ginkilala ang mga biktima kanday Francis Zarly Dela Cruz, 44 anyos, driver kang tricycle; Felomina Dela Cruz, senior citizen, lunsay residente kang Brgy. Poblacion, Barbaza; Dominico Española, kag Dionesia Española, lunsay senior citizen kag residente naman kang Brgy. Igpalge, sa amo man nga banwa.
Suno sa inisyal nga impormasyon, samtang nagabyahe sa national road ang tricycle halin sa Laua-an paadto sa Barbaza, kang naghana nga mag-overtake ang multicab nga paadto man sa kaangay nga direksyon apang may nagasugalaw nga motorsiklo rason nga nang-agaw kang linya ang multicab agud dya ang malikawan sa diin dya ron aksidente nga nasalapay ang tricycle.
Samtang, nagapatigayon ron kadya kang hot pursuit operation ang Barbaza MPS kag nagpakig-angut ron man sa Tibiao MPS para sa posible nga pagkadakup kang driver kang multicab.
