GI-REBYU na sa Regional Tripartite Wages and Productivity Board (RTWPB) 12 ang kasamtangang daily minimum wage sa mamumuo sa rehiyon human gikonsidera ang posibleng adjustment sa suholan.
Matud ni Jessie dela Cruz, RTWPB-12 secretary, tungod wala pay wage petition gikan sa workers group sa rehiyon magpahigayon na sila og ‘public consulation’ aron madunggan ang pulso sa mga mamumuo, management ug uban nga concerned sectors sa nagkadaiyang isyu sa suholan.
Sa Marso 30 gitakda ang public consulation sa GenSan ug Sarangani aron makatabang kanila sa pagrebyu sa guidelines, rules, procedures sa minimum wage fixing ug kasamtangang kondisyon sa socio-economic sa Soccsksargen.
Gikonsidera nila sa pagtakda sa pagsaka sa suholan mao ang panginahanglan sa mamumuo ug sa ilang pamilya.
Lakip ang pagtan-aw sa kapasidad sa employer ug industries nga mobayad requirements alang sa national development; investments ug employment generation activities. I Richel Gubalani
