NAKURATAN usab ang taga Sitio Royeca, Brgy. Bula sa dihang niabot ang daghang tubig baha sa ilang dapit bisan kon wala nay ulan, Mayo 19 sa kasamtangan nga tuig mao nga may mga tagbalay nga gibiyaan una ang ilang balay.
Mayo 20 sa buntag nakadawat og impormasyon ang 89.5 Brigada News FM GenSan nga sa sitio Royeca sakop sa Barangay Bula adunay baha ug gilunopan sila og tubig.
Sa pag-adto sa Brigada tinuod gayod ang impormasyon kay lawom pa ang tubig sa sementadong dalan sa Dr. Royeca Boulevard unya may mga pamilyang temporaryong nagpuyo sa usa ka pribadong luna, sa tapangko sa tindahan na nagaluto ang usaka ginang ug nagalutaw sa tubig baha ang mga bulak, taas usab ang tubig sa palibot sa ilang kapilya.
Sumala kay Dionesio Macalinao, 65-anyos, residente sa lugar lapaw sa tuhod ang tubig gabei sa Mayo 19 bisan kon wala nay ulan, unang higayon daw kini nga nahitabo sa ilang sitio, mao nga ilang gihimo gipang patong sa lamesa ilang mga kagamitan, samtang siya padayon sa iyang pagtinda gawas sa balay nagahulat kanus-a moubos ang tubig baha.
Samtang si Fely Datu sa iyang tapangko na sa gulay nagprito og isda, sa iyang tan aw ang sobrang tubig gikan sa GenSanville subd. didto niadto kanila ug nibaha sila nga wala nay ulan.
Samtang ang pamilya Lico gibiyaan ang ilang balay gumikan dili matulogan ang ilang balay, nakadawat usab sila og gamay nga hinabang gikan sa Sangguniang Kabataan sa Bula nga naghimo og community pantry sa ilang simbahan. (Ever Diazon)
