GIDAKOP sa mga personahe sa Governor Generoso Municipal Police Station ug mga Brgy. Tanod ang tulo ka lalaki naglibud og isda sa kadalanan sa Brgy. Tibanban Davao Oriental.
Sa report sa GovGen PNP, gikumpiska ang mga naka-baldeng isda sa mga lalaki pinasubay sa nipasulabing Brgy. Ordinance No. 4 Series of 2018.
Ubos sa Barangay Ordinance sa Tibanban, wala gitugotan ang pagpamaligya og mga isda daplin sa kalsada o bisan asa gawas na lamang kung sila anaa sa otorisado nga baligya-anan og isda o karne.
Sa gipagawas nga pagpaklaro sa kapulisan, nakadawat sila og reklamo gikan sa mga lisensyado nga tigmaligya ug isda/karne sa mga palengke nga nakibhangan ang ilang mga halin gumikan sa mga warik-warik fish vendor.
Ang mag nahisgutan dili lisensyado ug walay ginabayaran nga arka bala sa mag merkado hinungdan nga ginabawal.
Gitataw nga dugay na ang maong ordinansa ug nasayod na ang publiko kabahin sa implementasyon niini bisan unsang orasa.
Miani usab og managlahing reaksyon sa publiko ang pag-dakop sa tulo ka lalaki nga boot lamang manginabuhi pinaagi sa pagpamaligya og isda samtang ang uban nagkanayon nga aron walay moreklamo, mas maayong mukuha sab sila og permit aron mahimong patas ang panginabuhian.BNFM-DAVAO