Gipaabot na lamang nga pirmahan ni Davao City Mayor Sebastian Duterte ang Implementing Rules and Regulations (IRR) aron nga mapatuman na ang Mandatory Pre-emptive evacuation.
Sumala pa ni Davao City Disaster Risk Reduction and Management Office Head Alfredo Baloran, nga kini na lamang ang gipaabot aron nga mapatuman na ang maong ordinansa sa syudad sa Davao.
Samtang, hapit na sab matapos ang tulo ka mga evacuation centers nga padayong gina-construct dinhi sa syudad sa Davao.
Dugang pa ni Baloran nga anaa na sa 35% completion ang sa may Catigan, Toril, sa may Brgy. Mandug anaa na sab sa 60% completion ug hapit na sab matapos ang sa may Mahayag, Indangan ning syudad.
Laraw sab sa lokal nga panggamhanan sa Davao nga dugangan ang itukod nga Multipurpose Evacuation Area, labi pa dinhi sa unang Distrito.
Sumala ni Baloran nga kinahanglan og dako nga lugar gumikan sa kadaghan sa mga residente sa Poblasyon area diin anaa sa 3,000 sqm ang kinahaglan nga luna alang sa maong center.
