Nalimbuwad ang usa ka truck duol sa intersection sa may Pacific Mall siyudad sa Mandaue alas 11:12 kaganinang buntag, Mayo 17, 2024.
Matud ni Hyll Retuya, ang assistant department head sa Traffic Enforcement Agency of Mandaue (TEAM), nga self accident ang nahitabo.
Luwas ra hinuon ang driver sa truck ug ang helper niini. Ang truck gikan sa Lapu-Lapu City ug padulong unta sa lungsod sa Consolacion atol sa insidente.
Si Felix Suico Jr., ang operations head sa City Disaster Risk Reduction Management Office nagkanayun nga base sa CCTV, makitang kusog ang pagpadagan sa truck.
Nagtuo usab si Suico nga posibleng wala na lock sa driver ang matag kilid sa truck, hinungdan nahuso kini dihang mikurbada ang sakyanan.
Siya niingun nga wala ra nakaapekto sa trapiko ang insidente tungod anaa man usab kini nasulod sa gap sa Butuanon bridge.///
