Nagahinyo ang mga tricycle drivers sa syudad sang Roxas nga kun mahimo pataasan sang P5 ang pamasahe sang mga pasahero agud nga makaginansya man sila sa pang-adlaw-adlaw nga pagbyahe bangud asud-asod na ang pagtaas sang presyo sang gatong.
Sa interview sang Brigada News FM Roxas City sa mga tricycle drivers, ila ginpahayag nga pigado kag apektado gid ang ila byahe sa nagapadayon nga pagtaas sang presyo sang gasolina kag madamo man sang mga pasahero ang nagareklamo sa mahal nga pamasahe.
Nahibalun nga yara sa P15 ang minimum nga pamasahe sa tricycle.
Suno pa diri, may mga pasahero man nga nagabayad lang sang P10 kag kun ila reklamuhon gina-report pa sila sa Traffic Management Unit kag ginamultahan ukon kwaan sang lisensya gani wala gid sila sang mahimo.
Sa subong nga wala pa sang bag-o nga taripa nga ginpapanaog ang gobyerno sang syudad antuson na lang sang mga tricycle drivers ang kabudlay nga ila nabatyagan asta nga maka-income agud may ibakal sang pagkaon para sa ila pamilya. | Judy Ann Juare
