LEGAZPI CITY – Pormal nang inilunsar kasubanggi kan Department of Tourism (DOT) Bicol an Tourism Operations Protocol System (TOPS) sa Regional Site Center, Brgy. Rawis, Legazpi City kasarabay an nagkapirang opisyales kan manlain-laing provincial tourism offices sa rehiyon.
Segun kay DOT Regional Director Herbie Aguas, nagtutubod siya sa bagong digital system na piglunsar na makakatabang sa pagresolbar sa problema nin pagkua nin datos kan turismo sa kada probinsya, banwaan asin syudad.
Aminado siya na may kadepisilan sa pagkolektar nin datos huli ta an iba dae man nagsusumiter o haloy an pagsumiter nin datos na pighahagad.
Tinawan-doon pa kaini, an pigkokolektar na datos bako man padakulan nin numero sa turismo kundi matawan nin proyekto huli ta ini an basehan asin hihilingon kun pira an naglalaog na turista sa lugar nganing ma-improve asin ma-develop an lugar siring kan pagpapakaray nin tinampo asin kadakol pang proyekto.
Sa tabang kan nasambit na system, mapaparekas na an pagkua kan mga datos asin posible pang mapalangkaw an turismo huli ta kadakol an dae nalilistang numero kan turistang minaarabot sa rehiyon.
Sinabi pa ni Aguas, solamenteng Bicol Region pa sana an igwa kaining bagong teknolohiya o innovation asin pwedesir na an kada probinsya magkaigwa nin pilot testing tanganing maaraman kun tama an naglalaog na numero kan turista sa rehiyon.
